Haradinaj vlerëson punën e Komisionit për shënimin e kufirit shtetëror

PRISHTINË, 22 Mars/ATSH/.- Kryeministri i Kosovës, Ramush Haradinaj, vlerësoi sot punën e palodhshme dhe të mbështetur në fakte të Komisionit për Shënimin dhe Mirëmbajtjen e Kufirit Shtetëror.

Në një postim në Facebook, Haradinaj shkruaj se “argumentet e komisionit ndihmuan shumë lidershipin politik për të marrë vendime të duhura shtetërore, e veçanërisht puna e e tyre i ka ndihmuar deputetët e Kuvendit të Kosovës, të cilët me ratifikimin e Marrëveshjes i dhanë përgjigje një çështjeje që kishte mbetur pezull plot tre vjet”.

“Pjesë e marrëveshjes së ratifikuar është edhe raporti i Komisionit dhe deklarata e dy presidentëve që na detyron të bëjmë korrektimet e nevojshme në drejtim të Çakorrit dhe Kullës. Përkrahja e Komisionit për formimin e trupës së përbashkët me Malin e Zi është jetike në procesin e korrigjimeve të vijës kufitare sipas ligjit të ratifikuar dje”, shprehet Haradinaj.

Kuvendi i Kosovës ratifikoi në seancën e së mërkurës, me 80 vota pro, 11 kundër dhe asnjë abstenim marrëveshjen e Demarkacionit me Malin e Zi./k.s/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.