Nga stadiumi i Barcelonës te World Trade Center, ja studio që do të ndërtojë Teatrin e ri në Tiranë

687

Tiranë, 12 Mars/ATSH/- Studioja të cilës i është besuar dizajni i Teatrit të Ri Kombëtar është një nga më të njohurat në botë. Bjarke Ingels Group, ose siç njihet shkurt BIG, e cila ka realizuar një sërë projektesh të rëndësishme  në vende në ndryshme, ndërkohë që aktualisht është e përfshirë në një numër të madh projektesh në të gjithë Evropën, Amerikën e Veriut, Azinë dhe Lindjen e Mesme. Që nga viti 2016, zyra ka mbi 400 punonjës nga 25 vende të ndryshme të botës.

Një ndër veprat më të bukura pritet që të jetë edhe ndërtimi i stadiumit të Barcelonës, dizajni i të cilit  është besuar pikërisht Bjarke Ingels Group. “Camp Nou” i ri është konceptuar që të ruajë vlerat e arkitekturës së stadiumit historik, ku ndërthuret kultura tradicionale dhe bashkëkohore katalanase, ndërkohë që do të integrohet mjaft bukur edhe me hapësirat e reja. Një tjetër stadium është dhe  projektimi i shtëpisë së re të “The Washington Redskins”, një prej ekipeve më të njohura të futbollit amerikan.

Paralelisht, arkitektët e Bjarke Ingels Group, që do të kujdeset edhe për Teatrin e ri Kombëtar në Tiranë, është përzgjedhur edhe për ridizenjimin e Qendrës Botërore të Tregtisë, e rindërtuar në Manhattan, New York City që do të zëvendësojë dy kullat e shkatërruara nga sulmet terroriste të 11 shtatorit. Bjarke Ingels Group filloi të ridizenjojë Qendrën Tregtare Botërore në dhjetor 2014.

Gjithashtu i është besuar edhe projektimi i Googleplex. Kompania më e njohur në botë ka vendosur që të ndërtojë një kampus të ri në Kaliforni duke ia besuar pikërisht kompanisë së njohur daneze falë eksperiencës që ajo ka në projekte të tilla madhore.

Ndër projektet më të veçanta janë dhe ndërtimi i muzeve dhe i shtëpive të artit. Në Danimarkë Bjarke Ingels Group ka projektuar Muzeun e ri Detar Danez, i themeluar që në vitin 1915. Aty janë të vendosura modele të ndryshme anijesh, piktura, fotografi dhe artifakte që ilustrojnë luftërat si dhe tregtinë daneze me Kinën dhe Indinë. Muzeu ka mijëra piktura, një koleksion prej mbi 33,000 fotografish që ilustrojnë pothuajse të gjitha anijet daneze që nga viti 1880 dhe një bibliotekë prej 20,000 vëllime. Për ndërtimin e këtij muzeu,  Bjarke Ingels Group do të vlerësohej në vitin 2014 me Çmimin Evropian të Arkitekturës.

Në vitin 2006 u hap muzeu i artit modern Gyeonggi, i dizenjuar po nga Bjarke Ingels Group. Ndërkohë, arkitektët e Bjarke Ingels Group kanë projektuar Muzeun Kistefos Jevnaker në Norvegji, Greenland National Gallery for Art si dhe kanë projektuar ndërtesën e Koncerteve Stavanger për të cilën ka fituar edhe Luanin e Artë në vitin 2004 në Bienalen e Venedikut për projektin më të bukur.

Për të gjitha këto projekte të realizuara në SHBA, Francë, Gjermani, Azerbajzhan, Japoni, Emiratet e Bashkuara dhe në shumë vende të botës, Bjarke Ingels Group është vlerësuar me një sërë çmimesh të rëndësishme më fushën e arkitekturës dhe të urbanistikës. Në vitin 2006 dhe 2008 është  vlerësuar për ndërtesën më të mirë në Skandinavi. Një vit më vonë për përsosmëri për projektim ndërsa në vitin 2010, Çmimi Europian të vitit për Arkitekturë. Kjo studio është nderuar dhe nga Akademia Franceze e Arkitekturës në vitin 2011 me çmimin Delarue. Gazeta më e njohur në botë Wall Street Journal e cilësonte Bjarke Ingels Group si studion më inovatore. Në vitin 2012 dhe 2013 do të vlerësohej edhe nga Instituti Amerikan i Arkitektëve./e.caushi/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.